話說上次做左 「南乳叉燒 ~ 焗爐版」,叉燒味道一流,但用焗爐油煙太大,跟住的兩整天滿屋都是油煙味,後來燃點了兩天香薰才好些。 今次改用光波爐,油煙減少了,無油煙,叉燒肉質效果一樣咁好 ! 時間又短左,只需 20分鐘就食得!
今次去左超市買豬肉,揀左新鮮梅頭豬扒,一塊都有 3/4 吋厚,燒叉燒都啱用 ! (題外話,件豬扒咁厚,好難煎熟姐 ),買左一斤 $40。
如在超市買,可以有得揀,揀些油花多啲的,焗出來的叉燒肉質鬆化腍身。(原理同和牛一樣 )
洗乾淨,抹乾水份才醃肉,會更入味,醃肉時間約 30分鐘,視乎肉塊厚度,醃製時間不需太長,醃過久除了會太鹹之外,肉類水份流失,會令肉質變粗嚡。
此時可以煮定蜜汁,留意不要煮得太稠,因為糖放涼後會變得硬身,難以塗抹,所以好似下面咁可以順勢流下便可,如涼變硬左,加少少熱水煮軟便可。
光波爐食譜中用的時間和度數是 250度 x 10 min,反轉 250度 x 5 min,
我會視乎食物的厚薄來調較,如果全程用250度,食物表面會焦燶難熟,薄身的叉燒可以用 220度 x 12 min,塗上蜜汁焗 3分鐘,反轉後塗上蜜汁,220度 x 3-4分鐘
用剪刀修剪焦燶部位。(呢件叉燒就係跟左原食譜用250度.....燶晒 ! )
斬件之後,再掃上蜜汁.....多啲多啲.....好好味呀 !
食譜 :
材料 :
梅頭肉 一斤 (可分成 2條)
調味料:
乾葱 2粒(剁茸)、蒜茸 3粒、砂糖 2.5湯匙、鹽 1茶匙、雞粉 1茶匙、麻醬 半湯匙、大南乳 半件、生抽 一湯匙、雞蛋 一隻、五香粉 1/3茶匙、玫瑰露酒 半湯匙
蜜汁料:
麥芽糖 2大匙、水 1/4 碗、薑 2片、鹽 1/4 茶匙